அனைத்துலக தாய்மொழி நாள் – மொழி பன்முகத்தன்மையைப் பாதுகாக்கும் உலகளாவிய உறுதி

ஒவ்வொரு ஆண்டும் பிப்ரவரி 21ஆம் தேதி உலகம் முழுவதும் “அனைத்துலக தாய்மொழி நாள்” (International Mother Language Day) முக்கியத்துவத்துடன் அனுசரிக்கப்படுகிறது. மொழி பன்முகத்தன்மை, பண்பாட்டு பன்மை மற்றும் பல்மொழி ஆளுமையை ஊக்குவிக்கும் நோக்கில் UNESCO இந்த நாளை 1999ஆம் ஆண்டு நவம்பரில் அறிவித்தது. 2000ஆம் ஆண்டு முதல் உலகளவில் இந்நாள் கடைப்பிடிக்கப்பட்டு வருகிறது.

1952 பிப்ரவரி 21ஆம் தேதி, அன்றைய கிழக்கு பாகிஸ்தானில் (தற்போது வங்காள தேசம்) தாய்மொழியான வங்காளத்தை அரசு மொழியாக அங்கீகரிக்கக் கோரி மாணவர்கள் முன்னெடுத்த போராட்டத்தில் அரசு துப்பாக்கிச் சூடு நடத்தியதில் பலர் உயிரிழந்தனர். அந்த தியாகத்தை நினைவுகூரும் வகையில் வங்காள தேசத்தின் முயற்சியால் இந்நாள் அறிவிக்கப்பட்டது. பின்னர் United Nations General Assembly 2002ஆம் ஆண்டு இதனை உறுதிப்படுத்தியது.

2026ஆம் ஆண்டிற்கான கருப்பொருள் “பல்மொழிக் கல்வியில் இளைஞர்களின் குரல்கள்” (Youth Voices on Multilingual Education) என அறிவிக்கப்பட்டுள்ளது. ஆய்வுகளின்படி உலகில் ஒவ்வொரு இரண்டு வாரங்களுக்கும் ஒரு மொழி மறைந்து வருவதாகக் கூறப்படுகிறது. இது மொழிகளைப் பாதுகாக்க வேண்டிய அவசியத்தை வலியுறுத்துகிறது.

தாய்மொழிகளைப் பேணுதல், மறைந்து வரும் மொழிகளை காப்பாற்றுதல், அனைவருக்கும் தங்கள் தாய்மொழியில் கல்வி பெறும் உரிமையை உறுதி செய்தல் ஆகியவற்றை இந்நாள் நினைவூட்டுகிறது.

“யாமறிந்த மொழிகளிலே தமிழ்மொழிபோல் இனிதாவது எங்கும் காணோம்” எனப் பாடிய சுப்பிரமணிய பாரதி அவர்களின் வார்த்தைகளை நினைவுகூர்ந்து, நமது தாய்மொழித் தமிழை வளர்த்தும் பாதுகாத்தும் அடுத்த தலைமுறைக்கு பரிமாறுவோம்.

தமிழ் மொழி பேசும் அனைவருக்கும் அனைத்துலக தாய்மொழி நாள் நல்வாழ்த்துகள்!