தமிழர் கல்வி மேம்பாட்டு பேரவை ஏற்பாடு செய்த வருடாந்திர பாராட்டு விழா இவ்வாண்டு மிகச் சிறப்பாக நடைபெற்றது. இந்த ஆண்டு மட்டும் சுமார் 1300-க்கும் மேற்பட்ட பரிசுகள் வழங்கப்பட்டு, தமிழ் கல்வி வளர்ச்சியில் குறிப்பிடத்தக்க சாதனை படைக்கப்பட்டது.
London நகரில் நடைபெற்ற இந்நிகழ்வு, தமிழ் மொழியின் வேர்களுக்கு மதிப்பளிக்கும் மேடையாக அமைந்தது. தமிழ் மரபின் அரும்புகளை ஊக்குவிக்கும் நோக்கத்துடனும், தமிழ் மொழியை உயிருடன் காக்கும் தலைமுறையை பாராட்டும் மனப்பாங்குடனும் பல்வேறு விருதுகள் வழங்கப்பட்டன.
ஆண்டு 1 முதல் 12 ஆம் வகுப்பு வரை தமிழ் கற்றலில் சிறந்து விளங்கிய மாணவர்களுக்கு பரிசுகளும் பாராட்டுச் சான்றிதழ்களும் வழங்கப்பட்டன. பல பரிசுகள் பெற்ற மாணவர்களுக்கு இது மேலும் ஒரு பெருமை சேர்த்ததுடன், முதல் முறையாக விருது பெற்ற மாணவர்களுக்கு அது மகிழ்ச்சியின் உச்சமாக அமைந்தது.
மேலும், கல்வித் துறையில் நீண்ட காலமாக அர்ப்பணிப்புடன் பணியாற்றி வரும் ஆசிரியர்களின் சேவையும் கௌரவிக்கப்பட்டது. 25, 20, 15, 10, 5 மற்றும் 2 ஆண்டுகள் கல்விச் சேவையை நிறைவு செய்த ஆசிரியர்கள் நினைவுப்பரிசுகள் மற்றும் பாராட்டு சான்றிதழ்கள் மூலம் மதிப்பளிக்கப்பட்டனர். குறிப்பாக இரண்டாம் தலைமுறை ஆசிரியர்களின் பங்களிப்பு விழாவில் சிறப்பாக பாராட்டப்பட்டது.
தமிழ் மொழி மற்றும் மரபை அடுத்த தலைமுறைக்கு உறுதியாகப் பரப்பும் நோக்கில் நடைபெற்ற இவ்விழா, லண்டனில் தமிழ் கல்வி வளர்ச்சியின் ஒரு முக்கியமான மைல்கல்லாக அமைந்துள்ளது.
